У судзе Маскоўскага раёну абвешчаны прысуд шасьці ўдзельнікам падзеяў на плошчы Незалежнасьці ў Менску 19 сьнежня 2010 году. Судзьдзя Алена Шылько прысудзіла Дзьмітрыю Дароніну і Алегу Федаркевічу па 3,5 году, Сьцяпану Лобану, Сяргею Казакову, Яўгену Сакрэту па 3 гады калёніі агульнага рэжыму, Віталю Мацукевічу — 3 гады калёніі строгага рэжыму. Іх абвінавачваюць па частцы 2 арт. 293 Крымінальнага кодэксу «Масавыя беспарадкі».
Заля паседжаньняў Маскоўскага суду перад абвяшчэньнем прысуду была запоўненая цалкам: акрамя сваякоў, абвінавачаных прыйшлі падтрымаць таксама праваабаронцы і грамадзкія актывісты. Адна зь іх — Тацьцяна Кім, маці моладзевага актывіста Андрэя Кіма, зайшоўшы, выгукнула «Жыве Беларусь», і ёй адказалі некаторыя з абвінавачаных і прысутных у залі. Дзяржаўны пракурор Мельнік прасіў пакараць падсудных большымі тэрмінамі, але і абвешчаны прысуд судзьдзёй Аленай Шылько сваякі слухалі са сьлязьмі на вачах. На разьвітаньне яны выгуквалі сваім родным словы падтрымкі.
Your browser doesn’t support HTML5
Міхаіл Даронін пра вырак сыну
Сваяк Сяргея Казакова: «Я ня ведаю, хто ў гэтай залі можа лічыць гэты суд справядлівым, акрамя пракурора хіба. Але рана ці позна ў той жа клетцы будуць сядзець судзьдзя з пракурорам, а таксама спэцназаўцамі».
Сваяк Дзьмітрыя Дароніна: «Што я пра суд магу сказаць? Што гэта за пракурор, які ня мог па-людзку паставіцца да нашых дзяцей? І ўвогуле не разумею: што думае прэзыдэнт Лукашэнка, куды ён глядзіць, чые ён лёсы калечыць? У яго ж яшчэ сын расьце малы, 6 год — няхай падумае пра яго. Яшчэ не вядома што зь ім будзе — магчыма, яшчэ горш, чым з маім, горш, чым з гэтымі дзецьмі, якіх яны садзяць. Я прыйду да цябе, Аляксандр Рыгоравіч, прыйду. Сустрэнемся ў рэзыдэнцыі».
Падчас судовага працэсу і па ягоным завяршэньні адвакаты і праваабаронцы заяўлялі пра недаказанасьць абвінавачаньняў, пра іх неадпаведнасьць учыненаму асуджанымі. Пра гэта ж казалі пасьля суду і неабыякавыя людзі, якія прыйшлі падтрымаць зьняволеных. Сярод іншых — Галіна Сіўчык, маці грамадзкага і палітычнага актывіста Вячаслава Сіўчыка:
«Гэтыя людзі не зьяўляюцца сябрамі нейкіх палітычных партый, нават не знаёмыя паміж сабой — як іх дзеяньні могуць падпадаць пад групавыя? Паводле такога прынцыпу трэба было браць усіх сто тысяч, якія там былі на плошчы, і масава ўсіх асуджваць. Жахлівы вырак, жахлівы. Проста нельга ўжо ўсё гэта трываць».
Чарговы прысуд шасьці ўдзельнікам падзеяў на плошчы Незалежнасьці 19 сьнежня праваабаронца Ўладзімер Лабковіч назваў палітычным, а асуджаных — палітвязьнямі:
Your browser doesn’t support HTML5
Уладзімер Лабковіч пра прысуды Дароніну і іншым
«Мы чарговым разам сталі сьведкамі працы рэпрэсіўнай машыны, дзе людзі сталі, безумоўна, палітычнымі ахвярамі сёньняшняга рэжыму. Безумоўна, гэта палітычна матываваны прысуд, а яны зьяўляюцца палітвязьнямі. І тыя тэрміны, якія яны атрымалі, несувымерныя з тымі ўчынкамі, якія яны зьдзейсьнілі. Адзіным справядлівым рашэньнем суда на гэты момант было б вызваленьне іх з-пад варты, бо тое, што яны сёньня ўжо адседзелі, цалкам перакрывае тыя ўчынкі, якія яны зьдзейсьнілі».
Сваякі зьвінавачаных намерваюцца абскардзіць рашэньне суда Маскоўскага раёну ў судах вышэйшых інстанцыяў.
