З 17 сьнежня прыпыненыя пастаўкі дызэльнага паліва зь Беларусі ў Эўропу, пры гэтым пастаўкі расейскага паліва па нафтаправодзе "Дружба" праз тэрыторыю Беларусі ў Польшчу і Нямеччыну працягваюцца, паведамляе "Нямецкая хваля".
Паводле аднаго з нафтавых трэйдэраў у Лёндане, зь Беларусі "ўжо не паступае нічога", хаця аб’емы беларускіх паставак і раней былі невялікія. Звычайна Беларусь штомесяц пастаўляе ў Эўропу каля 200 тысяч тон дызэльнага паліва. Аднак цяпер гэтая Беларусь сама мае патрэбу ў паліве, паколькі з пачатку 2011 года Расія спыніла пастаўку нафты ў Беларусь.
Беларускія і расейскія кампаніі не змаглі самастойна дамовіцца аб цане паставак нафты ў Беларусь у 2011 годзе, і яны не адновяцца, як мінімум, да 20 студзеня. Зараз гэтае пытаньне будзе вырашацца на ўзроўні кіраўнікоў урадаў дзьвюх краін Міхаіла Мясьніковіча і Уладзіміра Пуціна, паведаміла крыніца ў беларускім урадзе.
17 студзеня адбыліся перамовы па "нафтавым" пытаньні паміж віцэ-прэм'ерамі Беларусі і Расеі Ўладзімерам Сямашкам і Ігарам Сечыным. Сустрэча прэм'ераў Беларусі і Расеі ў Маскве заплянаваная на 20 студзеня, паведамляе Reuters. "Чакаецца, што прэм'ер-міністар Беларусі абмяркуе пытаньне паставак нафты з Уладзімерам Пуціным. Паколькі гэтае пытаньне не ўдалося вырашыць кампаніям, ён выходзіць на больш высокі ўзровень", - сказаў прадстаўнік урада Беларусі.
Расейскія нафтаздабываючыя кампаніі настойваюць на павышэньні цаны на нафту, якая пастаўляецца ў Беларусь, на 45 даляраў за тону. У Расеі гэта тлумачаць ростам сусьветных цэнаў на нафту, а таксама тым, што Беларусь з 1 лютага падвышае на 12,5% тарыф на транзыт нафты. У студзені Расея павінна была паставіць у Беларусь 1,5 млн. тон нафты, аднак з 1 студзеня і па цяперашні сапраўдны момант пастаўкі не ажыцьцяўляюцца.