3 студзеня выйшлі на волю звыш 100 вязьняў ізалятараў на Акрэсьціна, Скарыны, а таксама Жодзінскага СІЗА, якія атрымалі за ўдзел у мітынгу найбольшае пакараньне — 15 сутак адміністрацыйнага арышту. Што кажуць былыя вязьні пра сваё затрыманьне, суды і ўмовы адбыцьця пакараньня?
Your browser doesn’t support HTML5
"На Плошчы было дзікунства"
3 студзеня ў менскага студэнта Арцёма меўся быць экзамэн. «Праляцеў», — жартуе юнак, толькі выйшаўшы з ізалятара на Акрэсьціна, дзе давялося прабыць 15 сутак. Арцёму 18 гадоў. Ён кажа, што сьвядома ішоў на плошчу, каб пратэставаць супроць фальсыфікацыі выбараў і становішча ў краіне, якое яго ніяк не задавальняе:
«З уладай, што яна робіць, я цалкам нязгодны. У нас усё грунтуецца на хлусьні і запалохваньні. Як так жыць далей? Трэба неяк ісьці наперад, а мы назад. Мы ўжо адкаціліся гадоў на 16 назад».
Арцём мяркуе, што з інстытуту яго адлічаць. Не выключае звальненьня з працы і Павал, выкладчык. Павал ня згодны са сваім затрыманьнем і асуджэньнем:
«Затрымаў мяне спэцназ без аніякага нагадваньня пра правы і абавязкі, потым судзілі на падставе паказаньняў нібыта сьведак. Яшчэ з ізалятара накіраваў скаргі на затрыманьне і рашэньне суду ў пракуратуру і міліцыю».
Леаніда Чакіна затрымалі на плошчы, куды ён прыйшоў сьвядома, каб пратэставаць супроць вынікаў выбараў. У тым, што выбары сфальшаваныя, Леанід ня мае сумненьняў:
«Чалавек, які мае хоць 3 клясы адукацыі, можа сам падлічыць: колькі было сабрана подпісаў за кожнага кандыдата і колькі адзін потым нібыта атрымаў. Таму і перакананы, што выбары сфальшаваныя».
Сяржук Мацкойць трымаў у ізалятары галадоўку разам з сукамэрнікамі. Вынікам галадоўкі стала тое, што вязьняў двойчы вадзілі ў душ, чаго раней ніколі не было, кажа Сяржук, які не аднойчы адбываў пакараньні за ўдзел у несанкцыянаваных акцыях. Мацкойць згадвае пра затрыманьне і пра падзеі, якія гэтаму папярэднічалі:
«Затрымлівалі нас вельмі жорстка, калі мы стаялі ў жывым калідоры, які стварылі, каб прапусьціць кандыдатаў у прэзыдэнты на перамовы ў Цэнтравыбаркам. Дарэчы, гэты напад на будынак быў правакацыяй. Правакатары прыходзілі з драўлянымі палкамі, нават прынесьлі рыдлёўку і сякатар для ачысткі ад лёду. І потым гэтыя людзі імгненна кудысьці зьніклі. І тады пачаў дзейнічаць АМАП — вельмі жорстка. Нас у адзін аўтазак накідалі чалавек 70».
Пасьля абеду тых, хто мусіў выходзіць, вывозілі зь вязьніцы «спэцтранспартам».
Паводле праваабаронцы Насты Лойкі, былыя вязьні ўжо падалі дзясяткі скаргаў на дзеяньні міліцыі падчас затрыманьня і на парушэньні сваіх правоў у ізалятарах. У праваабарончай арганізацыі «Вясна» працягваюць збіраць зьвесткі пра падзеі 19 сьнежня і наступных дзён:
«Вельмі важна, што была створаная адмысловая анкета для тых, хто быў затрыманы. Зь яе дапамогай мы дакладна будзем ведаць агульны малюнак затрыманьняў і ў якіх умовах людзі адбывалі пакараньне».
Праваабаронцы кажуць, што пра ўсе парушэньні правоў грамадзянаў падчас падзеяў пасьля выбараў стане вядома міжнародным праваабарончым арганізацыям.
Пакуль з Акрэсьціна выходзілі людзі, якія адбылі сваё пакараньне, на іх вачох і на вачох журналістаў у ізалятар з Маскоўскага суду міліцыянты прывезьлі актывіста Паўла Юхневіча — яму суд даў 10 сутак арышту за ўдзел у мітынгу на плошчы Незалежнасьці. Арыштавалі Юхневіча 31 сьнежня. Такім чынам, канчатковае вызваленьне ўсіх вязьняў адкладаецца яшчэ на тыдзень.
