У беларускім урадзе заяўляюць, што могуць прыняць прапанову Расеі аб адмене мыта на нафту пры ўмове вяртаньня ёй мыта на нафтапрадукты. Аднак афіцыйна гэтая прапанова беларускаму боку не паступала.
Паводле намесьніка міністра замежных спраў Беларусі Андрэя Еўдачэні, беларускі ўрад пакуль не разглядае ў якасьці афіцыйнай прапанову, якую агучыў намесьнік міністра фінансаў Расеі Сяргей Шаталаў. Той заявіў, што Расея гатовая ў 2011 годзе адмовіцца ад экспартнага мыта на сырую нафту для Беларусі. Але пры ўмове, што гэта будзе кампэнсавана ўсім мытам, якое Беларусь атрымлівае ад экспарту сваіх нафтапрадуктаў. Гэтае мыта на нафтапрадукты павінна трапляць у расейскі бюджэт. Адначасова мяркуецца падвысіць расейскае экспартнае мыта на нафтапрадукты да 85—90% ад нафтавага, каб не датаваць беларускую нафтаперапрацоўку.
Прадстаўнік Міністэрства фінансаў Расеі Андрэй Матвееў паведаміў карэспандэнту "Свабоды", што да заявы Сяргея Шаталава ёсьць адзін камэнтар:
"Такая пазыцыя абмяркоўваецца, і гэта адзін з вэктараў руху. Усё. Гэта не канчаткова, проста адзін з варыянтаў, адзін з магчымых вэктараў руху".
Прэс-сакратар канцэрну "Белнафтахім" Марына Касьцючэнка патлумачыла, што ў канцэрне будуць падлічваць, наколькі прыймальная прапанова расейскага боку:
"За ўвесь беларускі бок мы ня можам гаварыць, безумоўна. Мы бяром удзел толькі ў якасьці сяброў камісіі, якая вядзе перамовы па пытаньнях, зьвязаных з Мытным саюзам. Колькасныя і фінансавыя моманты, безумоўна, будуць падлічвацца. І тады будзе прымацца пэўнае рашэньне беларускім бокам".
Памочнік міністра фінансаў Беларусі Павал Ладзік адзначыў, што "пакуль усё гэта ў працы".
МЗС Беларусі не пацьвярджае, што гэтая прапанова паступіла афіцыйна.
Спадар Ладзік не адказаў на пытаньне, ці давядзецца ў выніку нафтавых прапаноў пераглядаць бюджэт на 2011 год. Таксама ён нічога не паведаміў пра цэны на газ, закладзеныя ў бюджэт, бо яшчэ, маўляў, ня скончыўся перамоўны працэс.
Паводле міністра эканомікі Беларусі Мікалая Снапкова, афіцыйны Менск пагодзіцца на гэтую прапанову, бо ў яе аснове — роўныя ўмовы гаспадараньня. Маўляў, наконт пытаньняў нафтавага мыта цяпер ідуць перамовы.
Эканаміст Барыс Жаліба адзначае, што ацэнкі расейскай прапановы пакуль няма, бо трэба займацца падлікамі. Ён мяркуе, што беларускі бок можа не пайсьці на гэты варыянт вырашэньня нафтавай спрэчкі.
Калі будзе бязмытнай сырая нафта, то трэба будзе вярнуць мыта на нафтапрадукты.
Спадар Жаліба мяркуе: прапанова расейцаў выгадная беларускаму боку тым, што нафта будзе ўсё ж бязмытнай.
Я думаю, што беларускі бок ня пойдзе на гэтую прапанову.