24 траўня лідэр руху «За свабоду», экс-кандытат на прэзыдэнта Аляксандар Мілінкевіч выправіўся ў чатырохдзённую паездку ў ЗША.
«У праграме паездкі сустрэчы ў Кангрэсе ЗША, Дзярждэпартамэнце, Радзе нацыянальнай бясьпекі. Заплянаваныя размовы з былымі кандыдатамі ў прэзыдэнты ЗША Джонам Керы і Джонам Маккейнам. Не выключаецца, калі ўдасца, кароткая сустрэча зь Дзяржсакратаром ЗША Гілары Клінтан. Тэмы размоваў — сытуацыя ў Беларусі, стратэгія беларускіх праэўрапейўскіх сілаў падчас будучых прэзыдэнцкіх выбараў. Пасьля Вашынгтону Аляксандар Мілінкевіч накіруецца ў Нью-Ёрк, дзе заплянаваныя гутаркі з прадстаўнікамі беларускай даяспары», — паведаміў Алесь Лагвінец з руху «За свабоду».