Гарадзенскую фірму “Палёніка” чакае гаспадарчы суд, куды перадае матэрыялы абласная падатковая інспэкцыя. Фірмай кіруе Анжаліка Борыс —старшыня не прызнаванага ўладамі Саюзу палякаў. Празь фірму актывістам арганізацыі ўдаецца легальна ажыцьцяўляць асьветна-культурную дзейнасьць.
У Гарадзенскай абласной падатковай інспэкцыі Анжаліцы Борыс выдалі тры пратаколы праверак і паведамілі, што справа перадаецца ў гаспадарчы суд у зьвязку са шматлікімі выяўленымі парушэньнямі. Дата суду пакуль невядомая. Прэсавы сакратар Саюзу палякаў Ігар Банцар тлумачыць сытуацыю:
“Самае першае: нібыта нашая дамова з таварыствам “Вспульнота польска” ў Варшаве ня тычыцца бізнэсу, а зьяўляецца гуманітарнай дапамогай. А значыцца, мы з парушэньнем указу прэзыдэнта легалізуем гуманітарную дапамогу. Гэта асноўны закід, і, відаць, на гэтым будзе справа будавацца”.
Гаворка ідзе пра трыццаць тысяч даляраў, атрыманых з Польшчы на патрэбы фірмы “Палёніка”, зазначае Ігар Банцар:
“Гэта былі грошы, атрыманыя згодна з дамоваю афіцыйна, прыходзілі на рахунак, зь іх здымаліся падаткі. Тым ня менш, зараз яны нам інкрымінуюць, што яны павінны былі быць аформленыя як гуманітарная дапамога, а не як грошы, атрыманыя паводле бізнэс-кантракту ад нерэзыдэнта РБ, якім зьяўляецца “Вспульнота польска”.
Адстойваць інтарэсы фірмы “Палёніка” ў гаспадарчым судзе мае адвакат Ігар Сазановіч. Ці можна лічыць, што грошы ад “Вспульноты польскай” былі менавіта гуманітарнай дапамогай?
Сазановіч: “Мы будзем яшчэ разьбірацца. Разумееце, там усё неадназначна. Мы лічым, што — не, падатковая лічыць, што — так. Усё будзе вырашацца ў гаспадарчым судзе”.
Дамовай аб супрацоўніцтве фірмы “Палёніка” з “Вспульнотай польскай” прадугледжана навучаньне польскай мове, прапаганда польскай культуры, арганізацыя канцэртаў польскіх выканаўцаў, сьвяточныя мерапрыемствы, а таксама мэтадычныя заняткі для настаўнікаў. Фірма “Палёніка” мелася таксама займацца турызмам, напрыклад, прывозіць турыстаў з Польшчы. Але гэта не атрымалася — няма ліцэнзіі. Ігар Банцар тлумачыць:
“Год, як судзімся зь Міністэрствам спорту і турызму, каб атрымаць ліцэнзію. Справа наўмысна зацягваецца, яна ў Вышэйшым гаспадарчым судзе знаходзіцца, але нібы стаіць на мёртвым месцы. Відаць, яны чакаюць, што зараз фірму закрыюць. А справа цягнецца хутка год, было відавочна, што нам беспадстаўна адмовілі ў ліцэнзіі. Я размаўляў з адвакатам, ён кажа, што гэта называецца — “недаатрыманы прыбытак” з нашага боку, бо мы маглі б аказваць турыстычныя паслугі”.