Сойм Партыі БНФ без Баршчэўскага і Садоўскага

Сябра партыі БНФ Валянціна Сьвяцкая ўзначальвае жаночую камісію партыі. Яна кажа, што пра новы склад сойму шмат выказвацца ня мае жаданьня:

“Па-першае, сышлі дэпутаты Вярхоўнага Савету 12-скліканьня, якія шмат чаго зрабілі для будучай гісторыі незалежнай Беларусі пасьля 90-х гадоў. Гэта ў першую чаргу спадар Голубеў, спадар Садоўскі, спадар Баршчэўскі. Алесь Мех зрабіў самаадвод, і я тут цалкам згодная са спадарыняй Лаўроўскай, якая таксама зьняла сваю кандыдатуру, што адбыўся такі рэйдэрскі захоп. Мне вельмі непрыемна і цяжка пра гэта казаць, але адбылося тое, што адбылося. Я б не хацела далей разьвіваць гэтую тэму, але калі з сойму сыходзяць такія людзі, то гэта ня ёсьць добра”.

Былы сябра сойму, які гэтым разам узяў самаадвод, Пятро Садоўскі пра новую кіроўную структуру партыі выказваецца крытычна:

“На жаль, вырасла пакаленьне рэвалюцыянэраў “Джынс” і адбылася такая “культурная рэвалюцыя”. Можна часткова прызнаваць крытыку, што называецца, маладой каманды. Але старая ж каманда, перш чым прыйсьці ў фронт, нешта рабіла. А гэтыя людзі — яны проста ня ведаюць жыцьця, яны проста гуляюць у нейкую рэвалюцыю, а жыцьця яны ня ведаюць. Мы павінны гаварыць пра праблемы, пра пытаньні падаткаў, банкаўскай сыстэмы — пра тое, пра што спрачаецца Эўропа. Я зараз он-лайн чытаю нямецкую прэсу, у іх 27-га выбары ў Бундэстаг, дык яны спрачаюцца аб праблемах, а ў нас — ні слова. Ну, я гляджу на гэта ўсё — нічога страшнага не адбылося, але я ніколі ў непрыстойную кампанію не ўступаю. У партыі я застануся, але ў такім сойме — як я там буду?”

Сябра папярэдняга і цяперашняга складу сойму Віктар Івашкевіч, які вылучаўся кандыдатам на старшыню партыі, пра новы склад кіроўнай структуры выказваецца гэтак:

“Усё залежыць ад новаабранага кіраўніка, чым ён будзе займацца, якую працу праводзіць. Адпаведна будуць абірацца людзі, які будуць гэтую працу рабіць, у прынцыпе, незалежна ад складу сойму. Але я ня ведаю, чым на сёньня зьбіраецца займацца старшыня сойму, якую працу праводзіць, бо з праграмы я гэтага не зразумеў. У маёй праграме было ўсё зразумела і крок за крокам апісаная работа. Мне ніякіх прапаноў на гэтую хвіліну не паступала”.

Сябра партыі БНФ Вацлаў Арэшка таксама пераабраны ў новы склад сойму партыі, але кажа, што гэтым фактам ня вельмі задаволены:

“Вялікая перамога ў стане Лукашэнкі. Думаю, што бліжэйшым часам БНФ будзе яшчэ больш маргіналізаваны на палітычнай сцэне. І пры такім складзе кіраўніцтва наўрад ці партыя захавае свой уплыў, які мела як нацыянальна-дэмакратычны цэнтар. У гэтым я ня маю сумневу, бо гэтае кіраўніцтва прыйшло не для таго, каб нешта зьмяніць у краіне, а каб зьмяніць нешта ў сваім уласным жыцьці. Я магу сказаць, што з гэтым кіраўніцтвам я ня буду супрацоўнічаць, і калі буду працаваць у партыі, то перадусім для таго, каб партыя ня страціла свайго аўтарытэту і каб зьмяніць кіраўніцтва”.

Новы склад сойму партыі БНФ і яе кіраўніцтва камэнтуе палітоляг Аляксандар Класкоўскі:

“Да стырна прыйшла відавочна маладзейшая каманда. Але ня варта падыходзіць спрошчана, што калі маладзейшыя, дык — адпаведна больш энэргічныя, рашучыя і г.д. У партыі былі крызісныя зьявы, і разьвязка гэтай калізіі павінна была адбыцца. Аднак гэта пакуль зьвялося да міжусобнай барацьбы. Пра нейкія канцэптуальныя рэчы — як выйсьці з таго тупіку, у які загнаная зараз апазыцыя — вось пра гэта гаварылася мала. І зараз для новай каманды будзе важным вызначыцца, як рухацца далей, пад якімі лёзунгамі, зь якімі хаўрусьнікамі. І ўвогуле — як рэалізоўваць тыя прыгожыя мэты, пра якія гаварылася”.