Грамадзянка Расеі Валянціна Брускова, маці Ўладлены Функ, просіць амбасаду Расеі садзейнічаць вызваленьню яе дачкі.
Брускова кажа, што трывожыцца сытуацыяй вакол яе дачкі, не разумее, чаму Ўладлену не вызвалілі пасьля таго, як яны адбыла пакараньне.
13 сакавіка амбасадар Расеі Аляксандар Сурыкаў папрасіў ў міністра ўнутраных справаў Беларусі Ўладзімера Навумава паскорыць працэс высылкі Функ.У МУС абяцалі дапамагчы, падае БелаПАН словы адваката Зьміцера Гарачкі.
Брускова і адвакат Функ накіроўваюцца ў Гомель, каб дамагчыся сустрэчы з прадстаўнікамі Ўправы па грамадзянству і міграцыі, а таксама наведаць у ізалятары часовага ўтрыманьня саму Функ.
Уладлену Функ вызвалілі з турмы ў Гомелі 12 сакавіка. У той самы дзень яна плянавала вылецець у ЗША. Аднак яе адразу затрымалі і адвезьлі ў ізалятар часовага ўтрыманьня. У яе пашпарце паставілі пячатку, якая забараняе ўезд на тэрыторыю Беларусі цягам 10 год. Функ паведамілі, што яна ўяўляе пагрозу для нацыянальнай бясьпекі Беларусі.
Прадстаўнікі МУС паабяцалі выслаць яе з краіны да 14 сакавіка. Аднак пазьней дату дэпартацыі адклалі на нявызначаны тэрмін.
Працэдура высылкі зь Беларусі Ўладлены Функ адбываецца ў межах закону, кажа начальнік Управы па грамадзянству і міграцыі УУС Гомельскага аблвыканкаму Аляксандар Гарленка.
“Пастанова пра высылку была працягнута на тэрмін, неабходны для высылкі”, - дадаў Гарленка.
31-гадовая Ўладлена Функ – сакратарка амэрыканскага юрыста Эмануіла Зэльцэра. 11 жніўня 2008 году суд прызнаў вінаватым Зэльцэра ў замаху на камэрцыйны шпіянаж і пакараў трыма гадамі пазбаўленьня волі.