Прэм’ер-міністар Беларусі знаходзіцца зь візытам у Латвіі. Разам з прэм’ер-міністрам Латвіі Іварсам Годманісам ён узяў удзел у адкрыцьці нацыянальнай выставы Беларусі ў Латвіі "Беларусь-ЭКСПО 2008".
Падчас візыту пройдуць перамовы кіраўнікоў урадаў “сам-насам” і ў пашыраным складзе, а таксама будзе падпісаны шэраг пагадненьняў.
На адкрыцьці выставы ў Рызе Сяргей Сідосркі заявіў, што Беларусь зацікаўленая ў стабільным і доўгатэрміновым эканамічным супрацоўніцтве з Латвіяй. Паводле спадара Сідорскага, Латвія “трывала ўтрымлівае пазыцыю лідэра ў замежнагандлёвым абароце Беларусі”.
На выставе прадстаўленыя амаль 140 вытворцаў зь Беларусі.
Кіраўнік ураду Латвіі Іварс Годманіс падкрэсьліў, што Латвія зацікаўленая ў разьвіцьці эканамічнага і рэгіянальнага супрацоўніцтва з сваёй суседкай Беларусьсю. Паводле спадара Годманіса, Беларусь зьяўляецца вельмі важным гандлёвым партнэрам сярод краінаў не сябраў ЭЗ:
“Далейшае разьвіцьцё эканамічнага і гандлёвага супрацоўніцтва паміж Беларусьсю і Латвіяй дазволіць пераадолець усе цяжкасьці, якія ўзьнікаюць у сувязі з сусьветным фінансавым крызісам”.
Мінулая афіцыйная сустрэча прэм'ераў Латвіі і Беларусі адбылася 10 гадоў таму.
У ліпені 2008 году прэм'ер-міністар Латвіі Іварс Годманіс сустракаўся зь Сяргеем Сідорскім у будынку латвійскай памежнай аховы на КПП “Урбаны-Сіленэ”. Аднак пра гэтую сустрэчу стала вядома толькі ў жніўні.
Спадар Годманіс патлумачыў журналістам, што перамовы зь Сяргеем Сідорскім адпавядалі дзяржаўным інтарэсам Латвіі. Аднак вядома, што ў межах агульнаэўрапейскай палітыкі чыноўнікі краінаў Эўразьвязу не маглі сустракацца зь беларускімі калегамі, рангам вышэйшымі за намесьніка міністра.
Тады прэсавая служба Міністэрства замежных справаў Латвіі назвала гэтую сустрэчу “асаблівым выпадкам”.