“Мы наблізіліся да фінансавай піраміды”

Чаму афіцыйны Менск просіць грошай у гэтай уплывовай фінансавай структуры?

Місія МВФ пад кіраўніцтвам Нэвэна Матэса (Neven Mates) пачала сустрэчы ў Нацыянальным банку і беларускім урадзе. Яна працягне працу ў Менску да 6 лістапада. Пра гэта паведамілі ў прадстаўніцтве МВФ у Беларусі.

Нагадаем, Нацыянальны банк і ўрад Беларусі зьвярнуліся да МВФ з просьбай выдзеліць крэдыт у 2 мільярды даляраў. Паводле кіраўніка ўпраўленьня інфармацыі Нацыянальнага банку Беларусі Анатоля Драздова, “ідзе канфідэнцыйны працэс перамоваў”:

“Мы робім папераджальныя захады, каб усясьветны крызіс сур’ёзна не закрануў эканоміку Беларусі. Для гэтага нам трэба павялічыць золатавалютныя рэзэрвы, каб мець гэтую “падушку бясьпекі”. Адна справа — рабіць захады, калі ўжо хата гарыць. Іншая справа, калі ты бачыш, што там далёка на гарызонце тлее”.

Анатоль Драздоў нагадаў, што афіцыйны Менск адмаўляўся ад крэдытаў у МВФ ад 2004 году:

“Мы заявілі, што яны нам не патрэбныя на той момант. Яны і не былі патрэбныя. Нам хапала сваіх золатавалютных рэзэрваў, сытуацыя была стабільная ў краіне, дынамічна разьвівалася эканоміка. А цяпер вакол бушуе крызіс. Таму трэба зрабіць папераджальныя захады”.

Паводле брытанскай газэты The Independent, зварот афіцыйнага Менску па крэдыт да МВФ “выклікаў паніку сярод інвэстараў”. Беларусь трапіла ў адзін шэраг з Ісьляндыяй, Пакістанам, Вугоршчынай і Ўкраінай. Попыт на калійныя ўгнаеньні, нафту і нафтапрадукты, якія складаюць аснову экспарту Беларусі, зьменшыўся, таму чакаецца зьніжэньне валютнай выручкі.

Апошнім часам афіцыйны Менск шмат пазычаў. Але, паводле эканаміста Леаніда Злотнікава, цяпер умовы для новых крэдытаў пагоршыліся:

“У мінулым годзе прыцягненьне крэдытаў складала дзесьці больш за 7 мільярдаў даляраў. У той жа час прыйшлося аддаваць крэдыты, узятыя раней. У выніку ў Беларусі на падтрымку эканомікі засталося больш за 3 мільярды даляраў, гэта чыстае прыцягненьне капіталу. Але ў першай палове гэтага году чыстае прыцягненьне склала толькі 120 мільёнаў даляраў. Гэта азначае, што мы наблізіліся да фінансавай піраміды. Умовы прыцягненьня крэдытаў пагоршыліся. Мы ўцягнемся ў гэтую піраміду, калі мы будзем надалей прыцягваць камэрцыйныя крэдыты зь іншых краінаў. А вось крэдыты МВФ таньнейшыя па сваіх умовах. І, як правіла, яны доўгатэрміновыя. Зараз існуе патрэба ў зьнешняй падтрымцы эканомікі”.

Спадар Злотнікаў мяркуе, што пад уплывам усясьветнага фінансавага крызісу заробкі беларускіх грамадзянаў могуць зьменшыцца, а выплата пэнсій —зацягвацца.

Нагадаем: паводле прадстаўніка МВФ, усясьветны крызіс адмоўна паўплываў на эканоміку Беларусі, на доступ да зьнешняга фінансаваньня. У той жа час зьмена каньюнктуры ў міжнародным гандлі нэгатыўна паўплывала на плацежны балянс краіны.