Учора вечарам у Берасьці міліцыянты РУУС Маскоўскага раёну правялі ператрус у кватэры бацькоў моладзевага актывіста Міхаіла Ільіна.
Самога юнака затрымалі ноччу 15 верасьня ў 2:30 ля рэклямнай тумбы, калі ён клеіў на яе ўлёткі “Байкот выбарам”.
Берасьцейскі праваабаронца Ўладзімер Вялічкін паведаміў, што міліцыянты зьбілі Міхаіла Ільіна, але на судзе абвінавацілі ў хуліганстве яго самога і арыштавалі на пяць сутак.
Учора ў 19:40 міліцыянты правялі ператрус на кватэры бацькоў Міхаіла Ільіна. Афіцэры корпаліся ў кніжных шафах, нешта шукалі між старонкамі газэт і кніг. За імі моўчкі са страхам назіраў 3-гадовы Францішак — брат Міхаіла Ільіна.
