Сёньня камісія Барысаўскай гарадзкой выбарчай акругі №62 адмовіла ў рэгістрацыі кандыдатам у дэпутаты Палаты Прадстаўнікоў уласьніку і рэдактару недзяржаўнай газэты “Борисовские новости”.
У гутарцы з карэспандэнтам “Свабоды” спадар Букас заявіў:
“Мяне абвінавацілі ў недакладнасьці зьвестак у пададзенай дэклярацыі. Між тым, я ніводнай капейкі не ўтойвай. Прадставіў дакумэнт, які атрымаў ад бухгальтара. Яна палічыла, што прыбыткам рэдактара за год зьяўляецца грашовая сума, атрыманая ў банку па чэках. Між тым камісія залічыла за прыбытак і сумы, што прайшлі па безнаяўных разьліках рэдакцыі за паперу, паслугі сувязі, пошты і г.д.”.
Са словаў Анатоля Букаса, памылка не наўмысная, яна не сьведчыць, што прэтэндэнт на кандыдата спрабаваў фальшаваць. Суразмоўца цьвердзіць, што прычына памылкі тлумачыцца прафэсійная няпэўнасьцю дзяўчыны-бухгальтаркі.
“Сёньня я папрасіў у акруговай камісіі выпіску з пратакола паседжаньня і заўтра накіруюся ў Менск у Цэнтрвыбаркам. Нават фінансісты з падатковай інспэкцыі кажуць, што праўда мусіць быць за мной”.
Па інфармацыі Анатоля Букаса, ён зьяўляецца непажаданым уладзе вылучэнцам. Але ў яго падтрымку падпісаліся 1148 выбарцаў. Пры праверцы акруговая выбарчая камісія не забракавала ніводнага зь іх.