Сёньня ў Кобрынскі РАУС быў выкліканы сябра партыі БНФ, прэтэндэнт у кандыдаты ў дэпутаты ад АДС па Кобрынскай выбарчай акрузе № 12 Аляксандар Мех.
У паведамленьні для “Свабоды” ён патлумачыў, што сьледчы крымінальнага вышуку лейтэнант Зьміцер Шушкоў цікавіўся, дзе ён быў 3 ліпеня. Акрамя таго, міліцыянты ўзялі ў грамадзкага актывіста адбіткі пальцаў і прымушалі здаць на аналіз сьліну.
“Я адмовіўся і запатрабаваў прадставіць афіцыйны дакумэнт, — кажа спадар Мех. — Міліцыянты заявілі, што нібыта ў іх дакумэнт такі ёсьць, але ён сакрэтны. Тады я напісаў тлумачальную запіску, што адмаўляюся здаваць сьліну на аналіз, бо такое патрабаваньне не падмацаванае дакумэнтам”.
Са словаў Аляксандра Меха, у Кобрынскі РАУС былі, акрамя яго, выкліканы сябра партыі БНФ і грамадзкі актывіст Аляксандар Страчук, а таксама Яўген Лук’янчанка. У абодвух запатрабавалі пісьмовыя тлумачэньні ды ўзялі адбіткі пальцаў.
Яўген Лук’янчанка працуе ў акруговай выбарчай камісіі. Аляксандар Страчук — сябра ініцыятыўнай групы Аляксандра Меха.
“Гэта — частка выбарчай кампаніі, якую праводзіць цяперашняя ўлада ў Беларусі. Гэта маральны ціск, вельмі сур’ёзны. І гэта ўсё распрацавана раней”.
Нагадаем, што пасьля таго як інжынэр ААТ “Белтрасгаз”, сябра партыі БНФ Аляксандар Мех прыняў рашэньне ўдзельнічаць у парлямэнцкіх выбарах, яго звольнілі з працы.