21 траўня ў канцэртнай залі "Менск" гурт “Крамбамбуля” даў сольны канцэрт, на якім адбылася прэм’ера праграмы "Хвалі пазытыву", зь якой упершыню пасьля вялікага перапынку Крамбамбуля паедзе ў тур па гарадах Беларусі.
Галоўная тэма канцэрту – надыход лета. За сьценамі быў дождж, а ўнутры КЗ Менск на 2 гадзіны была створаная рэзэрвацыя сонечнага і бесклапотнага настрою.
Сцэна была выкананая ў дэкарацыях экзатычнага пляжу. Музыкі выйшлі на сцэну ў вясёлых квяцістых кашулях. За барнай стойкай справа – вядучы канцэрту і “бармэн” Віктар Шалкевіч. У перапынку ён частаваў гледачоў напоямі, а напрыканцы канцэрту (ці ўсё ж спэктаклю?) кідаў у публіку бананы.
Гэта другі сцэнічны касьцюм лідэра гурту Лявона Вольскага – у перапынку ён і ўсе ўдзельнікі гурту пераапрануліся. Падчас песьні “Абсэнт” Вольскі пайшоў “у народ”, да гледачоў, даючы ім магчымасьць падпець у свой мікрафон. Здаецца, раней за Лявонам такога не назіралася.
Акторка купалаўскага Ганна Хітрык (гурт ДетиДетей) экспрэсіўна, з “творчым надрывам” адцягнулася на песьнях “Баляда пра Шэйна-Джэка О'конэлі і ягоны сіні нос” і”Куфаль піва, келіх віскі”.
Сьвятлана Зелянкоўская згуляла ролю загадкавай эстэцкай паненкі “Інкогніта”. Праўда, у канцы канцэрту зьняла чорныя акуляры і распусьціла свае шыкоўныя доўгія валасы. Потым нават зьняла піджак, і некаторыя гледачы пачалі спадзявацца на стрыптыз – было адчуваньне, што на такім канцэрце ўсё магчыма. Але дарэмна – стрыптызу не было (падкідваю ідэю:)
“Марскі чалавек” Аляксандар Кулінковіч
Салістка гурту “Тарпач” Вольга Самусік гэтак пераканаўча па-дэкадэнцку выканала песьню “Безалькагольнае піва”, што многім відавочна ніколі не захочацца піць гэтае піва. Глядзіце на здымак і ўяўляйце тэкст: “Клянуся, болей ніколі я не буду піць безалькагольнае піва..”
Удзельнікі гурту праводзяць сэанс танцаў для гледачоў. Апошнія 4-5 песьняў уся заля была ўжо “на нагах” і не сядала да канца “Хваляў пазытыву”
Фота Ўладзя Грыдзіна