Літва заблякавала перамовы паміж Эўразьвязам і Расеяй пра новае пагадненьне. Яна патрабуе выканаць чатыры ўмовы. Адна зь іх — аднаўленьне паставак нафты праз нафтаправод “Дружба”. Ці падтрымае Беларусь Літву ў гэтай спрэчцы?
Кіраўніца дэпартамэнту інфармацыі Міністэрства замежных справаў Літвы Віялета Гайжаскайтэ сказала, што цягам амаль двух гадоў гэты нафтаправод не працуе. І расейскі бок не дае ніякіх тлумачэньняў.
У зьвязку са зьмяншэньнем ціску тыя аб'ёмы, якія раней пастаўляліся на Балтыю, немагчыма прапампоўваць
Хоць літоўскі бок прапаноўваў нават сваю тэхнічную дапамогу і ўдзел у рамонце. Пастаўкі нафты спыненыя нібыта з-за аварыі на трубаправодзе ў раёне Ўнечы.
Галоўны інжынэр наваполацкай “Дружбы” сказаў, што ад спыненьня паставак нафты ў Літву прадпрыемства церпіць страты. Ён заявіў, што Расея перастала пампаваць нафту на Літву:
“Папярэдне, на 57 кілямэтры ў іх адбылася аварыя. Пасьля гэтага быў зьменшаны ціск на выкідзе станцыі, якая знаходзіцца ў Расеі. У зьвязку са зьмяншэньнем ціску тыя аб'ёмы, якія раней пастаўляліся на Балтыю, немагчыма прапампоўваць”.
На прадпрыемства “Нафтан” у Наваполацку, аднак, нафта паступае.
“А гэтыя трубаправоды ад Полацку на Балтыю прастойваюць. Бо маршрутных даручэньняў на перапампоўваньне нафты з Полацку на краіны Балтыі няма”.
Прадстаўнік наваполацкай “Дружбы” сказаў, што прадпрыемства гатова працаваць у ранейшых аб'ёмах.
Кожны год скарачаюць гэтую “Дружбу”
У літоўскім МЗС кажуць, што ня маюць прэтэнзіяў да Беларусі, бо яна не зьяўляецца адказнай за “Дружбу”. Прадстаўнік літоўскага прадпрыемства “Мажэйкю нафта” Яцэк Ян Комар кажа, што Беларусь не бярэ ўдзелу ў гэтай спрэчцы. Але ўсё залежыць ад Крамля, бо справа тут не ў трубаправодзе, а ў палітыцы. “Мажэйкю нафта” зацікаўленая ў аднаўленьні паставак праз “Дружбу”, бо гэта таньнейшы, зручнейшы і экалягічна больш бясьпечны шлях.
“Раней нафта даходзіла да латвійскага порта Вэнтсьпілс. Калі расейцы скарацілі экспарт праз Вэнтсьпілс, тады яна толькі да нас даходзіла, да “Мажэйкю нафта”. А цяпер — толькі да Беларусі. Кожны год скарачаюць гэтую “Дружбу”.
Ці падтрымае Беларусь Літву ў спрэчцы з Расеяй? Сябра Савету рэспублікі Мікалай Чаргінец сказаў:
“Мы лічым, што Літва прымае рашэньне, зыходзячы са сваіх нацыянальных інтарэсаў. Нам умешвацца ў іх спрэчку з Расеяй нават неэтычна, калі яны спрачаюцца. Мы проста зь цікавасьцю будзем назіраць, што тут будзе.
Беларусь гатовая прадставіць сваю тэрыторыю для транзыту нафты і адкрыцьця новай галіны “Ямал-Эўропа”. Гэта бізнэс. Гэта эканоміка”.
Дэпутат Палаты прадстаўнікоў Сяргей Гайдукевіч заявіў:
“Мы тут займаем прамежкавую пазыцыю. Мы гатовыя быць добрым пасярэднікам паміж Эўропай і Расеяй. І ў дадзеным выпадку нам мяняць такую пазыцыю проста нявыгадна. Рабіць нейкія аднабаковыя рухі — гэта няправільна”.