Кіраўнік Беларускага Нацыянальнага алімпійскага камітэту (НАК) Аляксандар Лукашэнка на сёньняшні дзень ня вызначыўся, ці паедзе ён на 29 летнія Алімпійскія гульні у Пэкін
Пра гэта сёньня паведаміў міністар спорту і турызму Аляксандар Грыгараў падчас прэсавай канфэрэнцыі, прысьвечанай 100 дням да адкрыцьця Алімпіяды. “Прэзыдэнт сам прыме рашэньне, ехаць яму ці не ў Пэкін, але я хачу сказаць, што амбасада Беларусі ў Кітаі і іншыя арганізацыі ўжо паклапаціліся пра тое, каб у выпадку прыезду прэзыдэнт і іншыя службовыя асобы мелі ўсе неабходныя ўмовы для знаходжаньня ў Кітаі” – заявіў Грыгараў.
Міністар таксама паведаміў, што гэтым разам перад беларускімі алімпійцамі ня ставіцца задача здабыць пэўную колькасьць мэдалёў. Задача патрапіць у 20 наймацнейшых спартовых дзяржаваў сьвету, і па магчымасьці пераўзыйсьці вынік нашага самага лепшага выступу ў Сыднэі, калі беларускія Алімпійцы завайвалі 17 мэдалёў – паведаміў міністар