Сяргей Парсюкевіч: “Сваю віну не прызнаю катэгарычна” <img src="/img/icon-photogallary.gif" border=0 />

Болей за 30 чалавек прыйшлі ў суд, каб падтрымаць Сяргея Парсюкевіча. Гэта палітыкі, праваабаронцы, журналісты, прадпрымальнікі зь Менску і Віцебску.


Калі людзей пусьцілі ў судовую залю, Сяргей Парсюкевіч ужо знаходзіўся ў жалезнай клетцы. Пра прадпрымальніка вядома, што ў яго абвастрылася астма — і сапраўды было відаць, што пачуваецца Сяргей Парсюкевіч дрэнна.


У яго шэры колер твару, ён значна схуднеў, але пасылаў усьмешкі прысутным і найперш жонцы Натальлі і сыну Дзянісу, якія прыехалі зь Віцебску на працэс. Маці прадпрымальніка Вера Фёдараўна на суд прыехаць не змагла з-за хваробы.

Судзіць прадпрымальніка судзьдзя Ўладзімер Аўдзеенка, абараняе адвакатка Вера Страмкоўская.

Судзьдзя адразу разгледзеў два хадайніцтвы: адвакатка прасіла дапытаць сьведкаў з боку Парсюкевіча, якіх не апытала сьледзтва. Павал Вінаградаў, Аляксандр Важакоў і Карэн Акопаў гатовыя засьведчыць падзеі, якія адбываліся ў камэры турмы на Акрэсьціна, куды 14 студзеня патрапіў Сяргей Парсюкевіч за мітынг прадпрымальнікаў 10 студзеня. Гэтае хадайніцтва судзьдзя задаволіў, а вось просьбу Сяргея Парсюкевіча пра зьмену яму меры стрыманьня адхіліў. Судзьдзя спаслаўся на тое, што Парсюкевіча абвінавачваюць у цяжкім злачынстве, якое караецца ажно 6 гадамі зьняволеньня. Спасылкі на дрэннае здароўе Ўладзімер Аўдзеенка пад увагу ня ўзяў.

У першы дзень паседжаньня ўжо далі паказаньні міліцыянт Аляксандар Дулуб, які прызнаны ў справе пацярпелым, абвінавачаны Сяргей Парсюкевіч і некаторыя сьведкі. Аляксандар Дулуб распавёў пра тое, як яго нібыта ў асобным пакоі зьбіў Сяргей Парсюкевіч. Канфлікт , паводле міліцыянта, пачаўся ў камэры, дзе вывесілі самаробны бел-чырвона-белы сьцяг. Туды ўвайшоў ахоўнік Дулуб, усе падняліся, і толькі Сяргей Парсюкевіч нібыта застаўся ляжаць.

“Я некалькі разоў загадаў яму падымацца, а ён усё ляжаў. Пытаўся, чаму ён мусіць падымацца? Тады я яго лёгенька таўхануў нагой”, — прызнаў Аляксандар Дулуб. Потым ён нібыта запрасіў абвінавачанага ў пакой для апытаньняў, каб паказаць там правілы паводзінаў у ізалятары. Але там Сяргей Парсюкевіч нібыта напаў на яго і пачаў зьбіваць кулакамі па твары. Доказ гэтага — дадзеныя экспэртызы пра лёгкія цялесныя пашкоджаньні.

У паказаньнях Сяргея Парсюкевіча ўсё выглядае наадварот. Паводле прадпрымальніка, ён падняўся разам з усімі, але міліцыянт яго ўдарыў па назе, і ён запытаў: за што? Потым, калі яго выклікалі ў асобны пакой, там Аляксандар Дулуб нібыта пачаў яго зьбіваць: спачатку далонямі па вушах, каб не было сьлядоў зьбіцьця, потым наўпрост кулакамі па галаве. Ён адштурхнуў міліцыянта і спрабаваў яго спыніць. Тады забег другі ахоўнік, Якімчык. І ўдвох яны надзелі на яго кайданкі і пачалі душыць.

Каму паверыць судзьдзя? Невядома, але заля ўжо рэагуе на паказаньні. У прыватнасьці, Аляксандар Дулуб казаў, што Парсюкевіч вырваўся і ў калідоры крычаў па-беларуску “Ратуйце! Дапамажыце! Забіваюць!” Пасьля гэтага паказаньня судзьдзя прымусіў жонку прадпрымальніка Натальлю Парсюкевіч за ўсьмешку падняцца зь месца, і яна сама пакінула залю. Натальля кажа, што Сяргей ніколі не карыстаўся беларускай мовай у звычайным асяродку, і таму гэта відавочная хлусьня. Вось што жанчына сказала пра тое, чаму яна выйшла з залі:

“Гэта такая несправядлівасьць адбываецца. Калі Дулуб стаў даваць паказаньні. Лічу, гэта хлусьня. Я і ня вытрымала”.

Таксама судзьдзя выдаліў з залі двух журналістаў — аднаго за карыстаньне тэлефонам, другога —дыктафонам.

Пасьля допыту сьведкаў з боку пацярпелага паседжаньне перанесьлі на 23 красавіка. Яно пачнецца а 12 гадзіне.