Учора ў Бабруйску міліцыянты правялі ператрус у прыватным доме, які выкарыстоўваецца мясцовымі актывістамі як грамадзкі цэнтар. У выніку канфіскаваны пакунак з газэтай “Свабода”. Пацярпелыя зьбіраюцца скардзіцца на міліцыянтаў у пракуратуру.
Паводле Алеся Чыгіра, разам з двума міліцыянтамі прыйшоў супрацоўнік міністэрства надзвычайных сытуацый Сяргей Архіпенка. Пажарнік заявіў, што яму тэрмінова трэба абсьледаваць памяшканьні на прадмет пажарнай бясьпекі.
Алесь Чыгір распавёў:
“Яны паводзілі сябе як гаспадары. Лезьлі ва ўсе шуфляды, ва ўсе скрыні, што можна было перавярнуць, тое пераварочвалі. Дзякуй Богу, што ў нас была камэра й мы маглі ўсё гэта зьняць. Калі яны канчаткова азьвярэлі, яны проста пачалі нас зь Ігарам Ходзькам нахабным чынам зьбіваць. Такога ніколі яшчэ не было”, — кажа Алесь Чыгір.
Палітык кажа, што міліцыянты ўжылі гвалт пасьля таго, як ён і Ігар Ходзька селі на пакунак з газэтай “Свабода”, каб ня даць яго вынесьці. Са слоў актывіста, яму разьбілі нос, а Ігар Ходзька страціў прытомнасьць.
Алесь Чыгір лічыць, што міліцыянты выконвалі загад, і называе прычыны, якія маглі выклікаць гэта:
“Зараз у нашым горадзе нарастае незадавальненьне мясцовай уладай, бо яна займаецца толькі тым, што робіць прыпіскі ў лепшых савецкіх традыцыях. Другая прычына — гэта 25 сакавіка, дзевяностагодзьдзе абвяшчэньня Беларускай Народнай Рэспублікі. Улада баіцца, што людзі з рэгіёнаў могуць атрымаць інфармацыю пра гэтую значную падзею і паехаць у Менск”.
У пастарунку № 1 раённага аддзелу міліцыі дзяжурны зачытаў запіс у рэгістрацыйным журнале:
“Тут напісана: выяўлена друкаваная прадукцыя. Газэты там, відаць, нейкія знойдзены. Участковы разьбірацца будзе, адкуль яны і што яны”.
Міліцыянт, аднак, не сказаў, хто і як праводзіў пошук крамольных газэт.
Ці выявіў супрацоўнік міністэрства надзвычайных сытуацыяў прыкметы парушэньня пажарнай бясьпекі, высьветліць не ўдалося. Сяргей Архіпенка камэнтаваць учорашняе здарэньне адмовіўся.
Фатаздымкі з блогу ales-chyhir.livejournal.com
