Ці праўда, што ў Беларусі — адзін з самых працяглых у сьвеце водпускаў для дагляду дзіцяці?

Насамрэч

Чыстая праўда.

Трэба адрозьніваць адпачынак па цяжарнасьці і родах і водпуск для дагляду дзіцяці. У Беларусі адпачынак па цяжарнасьці і родах пачынаецца за 70 дзён да родаў і заканчваецца праз 56 дзён пасьля іх (18 тыдняў). У выпадках нараджэньня двух ці больш дзяцей водпуск па цяжарнасьці і родах у Беларусі завяршаецца праз 70 дзён пасьля родаў. У той жа час водпуск для дагляду дзіцяці доўжыцца да дасягненьня дзіцём 3-х гадоў. Тры гады плюс 70 дзён падчас цяжарнасьці складаюць 166 тыдняў.

Такую ж працягласьць мае дэкрэтны водпуск у Расеі і ва Ўкраіне. У Літве ён складае 106 тыдняў, у Латвіі — 94 тыдні, у Польшчы — ад 52-х да 69-ці тыдняў (на кожнае наступнае дзіця працягласьць падвышаецца), у Швэцыі — 68 тыдняў.

У Нямеччыне гэты водпуск складае 58 тыдняў, у Даніі і Канадзе — 52, у Кітаі і Ізраілі — 14 тыдняў. Адзін з самых кароткіх водпускаў для дагляду дзіцяці — у ЗША, там ён складае 12 тыдняў, ён меншы, чым беларускі водпуск па цяжарнасьці і родах.