Як зьмянялася плошча беларускай дзяржавы за апошнія 100 год.інфаграфіка
Пасьля 17 верасьня 1939 году беларуская дзяржава займела найбольшую плошчу за апошняе стагодзьдзе. Пасьля далучэньня Заходняй Беларусі тэрыторыя БССР вырасла на 80% і дасягнула плошчы 225 тысяч квадратных кілямэтраў. Свабода падрыхтавала інфаграфіку, якая адлюстроўвае зьмены дзяржаўных межаў і плошчы беларускай дзяржавы за апошнія 100 год.
Пасьля заканчэньня савецка-польскай вайны і падпісаньня Рыскага міру былі вызначаныя межы «першай» БССР — у яе ўвайшлі 6 паветаў былой Менскай губэрні.
Падчас першага ўзбуйненьня да БССР адышлі 15 паветаў і асобных валасьцей РСФСР — ад Віцебскай, Гомельскай і Смаленскай губэрняў.
Другое ўзбуйненьне БССР, калі ў яе склад уключылі Гомельскі і Рэчыцкі паветы РСФСР. З таго часу ўсходняя мяжа Беларусі застаецца нязьменнай па сёньня.
У верасьні 1939 году згодна з савецка-нямецкай дамовай СССР акупаваў усходнюю Польшчу, і да БССР была далучаная Заходняя Беларусь.
У лістападзе 1940-га Літве адначасова з уключэньнем яе ў склад СССР перадалі 2646 кв. км — памежныя тэрыторыі БССР разам з гарадамі Друскенікі, Сьвянцяны, Дзівінішкі ды інш.
У жніўні 1945 году Польшчы перадалі Беластоцкую вобласьць плошчай 15 400 кв. км. Гэта быў апошні раз, калі плошча краіны істотна зьмянілася. У межах 1945 года Беларусь атрымала незалежнасьць і існуе па сёньня.