Шэсьце ў Лошыцу. Жывы рэпартаж

Радыё Свабода пачынае жывы рэпартаж шэсьця ў Лошыцу.

У Менску ідзе дождж. Тэмпэратура: +9.

На месца збору прыйшоў актывіст КХП-БНФ Уладзімер Юхо.

На пляцоўцы ля Дому культуры стаіць міліцэйская машына, а таксама 2 машыны зь людзьмі ў цывільным.

Плян:
12:00 — збор удзельнікаў каля Палаца культуры «Лошыцкі» (вуліца Маякоўскага, 129).
12:30 — пачатак шэсьця.
13:30 — мэмарыяльны мітынг каля крыжа ў Лошыцы.

Зьявіўся першы бел-чырвона-белы сьцяг. Яго разгарнуў грамадзкі актывіст Ільля Дабратвор.

На месцы збору ўдзельнікаў мітынгу ўжо прысутнічаюць кіраўнікі КХП-БНФ: Юры Беленькі, Сяргей Папкоў і Валеры Буйвал.

Людзі працягваюць зьбірацца.

Мапа Шэсьця:

Некалькі дзясяткаў людзей хаваліся ад дажджу ў падземным пераходзе. Міліцыянты запатрабавалі ад Юрася Беленькага, каб людзі пакінулі пераход.



Людзі выйшлі і стаяць пад даждом.

Зьявілася расьцяжка «Кансэрватыўна-хрысьціянская партыя БНФ» і яшчэ некалькі бел-чырвона-белых сьцягоў.

Некаторыя ўдзельнікі акцыі трымаюць у руках запаленныя зьнічы.

Лошыцкі Яр — урочышча, дзе органы НКУС у 1937–1941 гадах праводзілі масавыя расстрэлы. Колькасьць ахвяраў застаецца невядомай. У 1988 годзе Яр засыпалі, а на яго месцы збудавалі гаражны каапэратыў.

КХП-БНФ ладзіць мэмарыяльнае шэсьце ў Лошыцкі Яр штогод.

Людзі пачынаюць будаваць калёну. Расьцяжкі: «Беларуская салідарнасьць – наш cупраціў расейскай акупацыі», «Дзяды», «Кансэрватыўна-Хрысьціянская партыя БНФ».



На месцы збору – прыкладна 50 чалавек. Шмат моладзі.

Калёна пачала рух.

Непадалёк ад месца збору ўдзельнікаў шэсьця карэспандэнты Радыё Свабода заўважылі аўтобус, у якім сядзяць людзі ў цывільным, побач стаіць аўтазак.

Юрась Беленькі заявіў Радыё Свабода, што ў акцыі ўдзельнічаюць 70 чалавек. Акрамя актывістаў КХП-БНФ і моладзі, у калёне ідуць чальцы іншых палітычных партыяў.

Беленькі называе гэта станоўчым момантам.

Майка ўдзельніка мітынга Леаніда Смаўжа

Калёна дайшла да крыжа ў Лошыцкім Яры.

Пачынаецца мітынг.

Валеры Буйвал зачытаў ліст ад старшыні КХП-БНФ Зянона Пазьняка.

Пазьняк піша, што беларуска мова заўсёды зьяўлялася аб'ектам асаблівага перасьледу з боку «расейскіх акупантаў».

Пазьняк падтрымлівае нядаўнія выказваньні Юрася Беленькага.

Пазьняк кажа, што Беленькі назваў рэчы сваімі імёнамі.

3 лістапада Беленькі на мітынгу ў Курапатах заявіў: «Палітыка зьнішчэньня, якую праводзіць супраць нас Расейская імпэрыя, не спынілася. Яна мае проста іншыя формы. Сёньня гэта русыфікацыя, пазбаўленьне нас гістарычнай памяці, пазбаўленьне нас нашай нацыянальнай культуры. Сёньня гэта водападзел змаганьня нас, беларусаў, за выжываньне супраць акупантаў. Я зьвяртаюся да кожнага чалавека тут, асабліва да моладзі. Памятайма: калі ты гаворыш па-расейску, ты ў войску акупанта і страляеш у свой народ. Бо калі адбудзецца поўная русыфікацыя (я ўпэўнены, што гэтага не адбудзецца), але адбудзецца, то можна ўявіць сабе, ў што ператворацца нашы людзі».

Жывы рэпартаж з шэсьця і мітынгу ў Курапатах чытайце тут

Мітынг скончыўся. Людзі ўскладаюць кветкі і запальваюць зьнічы.

Міліцыя затрымала Леаніда Смаўжа.

Пасьля мітынгу, Смоўж пайшоў у бок Камвольнага камбінату. За ім сачылі некалькі чалавек у цывільным.

Карэспандэнты Радыё Свабода чулі, як міліцыянты па рацыі перамаўляліся пра тое, дзе знаходзіцца Смоўж і куды ён ідзе.

Смаўжа затрымалі на прыпынку грамадзкага транспарту, удакладняе журналіст Антон Сурапін.

Напярэдадні затрыманьня Леанід Смоўж у інтэрвію Радыё Свабода паведаміў, што «ён сам па сабе» і не належыць да нейкіх палітычных сілаў.

Ён заявіў, што апрануў майку з надпісам «За Беларусь без дыктатуры», бо пратэстуе супраць несправядлівасьці — цягам некалькіх год ён не можа ўладкавацца на працу.

Леанід Смоўж заявіў, што ягоныя продкі цярпелі ад савецкай улады.

Смоўж жыве ў Стаўпецкім раёне Менскай вобласьці.

Леаніда Смаўжа павезьлі ў пастарунак міліцыі Ленінскага раёну Менску, паведаміў Радыё Свабода грамадзкі актывіст Ільля Дабратвор.

Дабратвор сыходзіў зь мітынгу разам са Смаўжом.

«За намі шлі два чалавекі ў цывільным, а на прыпынку грамадзкага транспарту ўжо стаяла міліцэйская машына. Смоўж так і сказаў: „Мяне будуць браць“. Але ён пабачыў, што на іншы прыпынак пад’яжджае тралейбус. Рвануў туды! Міліцыянты па рацыі адразу сталі перагаворвацца, што ён зьбягае. Смоўж амаль пасьпеў. 5 ці 6 чалавек у цывільнымі літаральна выцягулі яго з тралейбусу», — апісаў затрыманьне Ільля Дабратвор.

Выніковая фотагалерэя