Абмежаваньні ў наведваньні мэмарыяльнага комплексу ў магілёўскім раёне Задняпроўе ў гарадзкім прадпрыемстве рытуальных паслугаў лічаць вымушаным захадам, каб абараніць брацкую магілу ад вандалаў.
Гэты мэмарыял быў пабудаваны прыканцы 80-х гадоў на месцы Лупалаўскага лягеру сьмерці. Там у гады фашысцкай акупацыі было зьнішчана больш за 40 тысячаў ваеннапалонных.
Апошнім часам комплекс стаў прытулкам для бамжоў. Ля «вечнага вагню» зьбіраліся п’яныя кампаніі. А нядаўна яго разрабавалі злодзеі, якія палююць на лом каляровых мэталяў. Былі скрадзеныя бронзавыя пласьціны, якія давялося аднаўляць. Таму раённая адміністрацыя прыняла рашэньне прывесьці комплекс у парадак і зачыніць. Ён адкрыты для наведвальнікаў толькі ў выходныя дні ў сьветлы час сутак.
Паводле слоў дырэктара прадпрыемства рытуальных паслугаў Ігара Горскага, пратэстаў у сувязі з гэтым не паступала. Мясцовыя жыхары комплексам не цікавяцца, сюды зрэдку прыяжджаюць толькі дэлегацыі ды экскурсіі. Новы парадак, упэўненыя чыноўнікі, дазволіць абараніць мэмарыял ад хуліганаў ды злодзеяў.
Ад нападаў вандалаў церпяць і іншыя мэмарыялы і могілкі ў Магілёўскай вобласьці. У Касьцюковічах мэмарыял ахвяраў Вялікай Айчыннай вайны рабавалі двойчы, адтуль скралі 22 пліты з прозьвішчамі салдатаў. Злодзеяў знайшлі, аднак пліты давядзецца рабіць нанова, для гэтага патрэбныя грошы — больш за 10 мільёнаў рублёў.
Сёлета былі разрабаваныя на ўпрыгажэньні з каляровых мэталяў старажытныя помнікі на зачыненых Польскіх могілках у Магілёве. Некалькі месяцаў таму на Габрэйскіх могілках у Бабруйску былі апаганеныя чатыры помнікі. Старшыня Бабруйскай габрэйскай супольнасьці Леанід Рубінштэйн паведаміў, што невядомых, якія пашкодзілі выявы нябожчыкаў, намалявалі на помніках свастыку і зьневажальныя словы, так і не зайшлі.
Да гэтага часу не зьліквідаваныя наступствы вандалізму савецкіх часоў на Габрэйскіх могілках у Магілёве — такое меркаваньне кіраўніка гарадзкой габрэйскай супольнасьці Навума Іофэ. З 1979 году новымі пахаваньнямі, якія дазволіла ўлада, там былі зьнішчаныя тысячы старых габрэйскіх магілаў, разрабаваныя помнікі, і да гэтага часу, лічаць магілёўскія габрэі, так і не ўдаецца навесьці парадак на могілках.
