“Бясплатнае навучанне, самая нізкая плата за кватэру...”
18.04.2008 09:40
Пра што пісалі беларускія газэты 18 красавіка ў розныя гады мінулага.
“Дзянніца” на гэтым тыдні 1918 году піша: “Усе газэты абляцела вестка аб тым, што Беларусь абвешчана незалежнай народнай рэспублікай. Ці прауду, ці непрауду гавора яна — праканацца цяжка. Цяжэй гэтаго праведаць тыя варункі і абставіны, пры якіх усе гэта памайстравалася... Есць апаска, і апаска вахкая, што наша краіна атрымала у нямецкум падарунку пад тулям “незалежнасці”, залежнасць дубальтовую, як у эканамічным, гэтак і у культурна-нацыянальным значэньню...”
“Савецкая Беларусь” у 1928 годзе паведамляе пра краязнаўчую выставу: “Сярод фатаграфій асабліва выдатныя т.Сербава. Даволі багата прадстаўлен аддзел зарысовак беларускага ткацтва. Тут сабраны вельмі прыгожыя і ўдалыя ўзоры нашага народнага ткацтва. Гледзячы на іх, проста робіцца дзіўным, чаму да гэтага часу ў нас нічога ня зроблена, каб гэтыя гарманічныя ўзоры перанесьці ў прамысловае ткацтва, ці хоць бы ў саматужныя майстэрні”.
Пад рубрыкай “Мінчане горача ўхваляюць новую Канстытуцыю БССР” “Вячэрні Мінск” у 1978 годзе адзначае: “У нас створаны ўсе ўмовы для таго, каб дзеці сталі прадаўжальнікамі справы сваіх бацькоў і маці, актыўнымі будаўнікамі новага, камуністычнага грамадства. Бясплатнае навучанне, чаго няма ні ў адной капіталістычнай краіне, добраўпарадкаванае жыллё, самая нізкая плата за кватэру, за наведанне дашкольных устаноў... Бацькам застаецца толькі добрасумленна ставіцца да выхавання дзяцей”.
Няма камэнтароў. Дадайце свой і будзьце першы