Акцыя прадпрымальнікаў ператварылася ў палітычную
Міліцыя арыштоўвае дэманстрантаў
10.01.2008 20:28
Мітынг прадпрымальнікаў у Менску ператварыўся ў дэманстрацыю, а эканамічныя лёзунгі паступова зьмяніліся палітычнымі патрабаваньнямі.
Сёньня апоўдні на Кастрычніцкай плошчы Менску сабраліся сотні прадпрымальнікаў. Яны прыйшлі, каб выказаць сваё стаўленьне да палітыкі ўладаў адносна малога бізнэсу ў Беларусі.
Паводле падлікаў удзельнікаў акцыі, супрацоўнікаў міліцыі і назіральнікаў, у мітынгу і шэсьці ўдзельнічалі агулам больш за дзьве тысячы чалавек. Прэвэнтыўна супрацоўнікі міліцыі затрымалі некалькі актывістаў прадпрымальніцкага руху. Спэцназаўцы ў цывільным сачылі падчас акцыі за лідэрамі палітычных партый.
Лідэра “Пэрспэктывы” Анатоля Шумчанку і яшчэ некалькі прадпрымальнікаў дэлегавалі на перамовы ў адміністрацыю Аляксандра Лукашэнкі. Тым часам на плошчы адбываўся мітынг, у якім удзельнічалі ня толькі прадпрымальнікі, але й палітыкі. Анатоль Лябедзька заявіў:
“Калі вы працягнеце сваю барацьбу, то заўтра вы знойдзеце сотні тысячаў прыхільнікаў сярод звычайных грамадзян, якія сёньня прыйшлі на рынкі ў Ждановічах, у Барысаве, Салігорску і ўбачылі пустыя паліцы. Празь месяц яны адчуюць гэта. Нядаўна вы праявілі вялізарную мужнасьць. Упершыню з 1996 году некалькі тысяч людзей прыйшлі на пляц Незалежнасьці. І гэта была ваша маленькая першая перамога”.
Аляксандар Мілінкевіч сказаў:
“Некаторым здаецца, што калі прадпрымальнікаў сотні тысячаў, то столькі ж іх павінна быць на вуліцы. У ніводнай краіне так не было. Заўсёды выходзяць самыя сьмелыя. Самыя мужныя. І іх меншасьць. Але гэтая меншасьць мае вялікую маральную перавагу. Таму я ўдзячны тым, хто тут ёсьць, і лічу гэта пэўнай перамогай. Людзі разумеюць, што бязь зьменаў палітычных у краіне ня будзе і зьменаў эканамічных”.
Прадпрымальнікі ня сталі чакаць дэлегатаў на плошчы і вырашылі прайсьці да будынку адміністрацыі Аляксандра Лукашэнкі. Яны занялі праезную частку праспэкту Незалежнасьці, перакрыўшы дарожны рух. Некалькі супрацоўнікаў ДАІ ўгаворвалі людзей сысьці, але калі кіроўцы аўтамабіляў пачалі сыгналіць на знак салідарнасьці з прадпрымальнікамі, гэта надало апошнім рашучасьці. Натоўп стаў павялічвацца і на некалькі хвілін цалкам перакрыў дарожны рух.
Потым дэманстранты вызвалілі дзьве паласы, каб не замінаць спэцтранспарту. На вуліцы Энгельса спэцназаўцы перакрылі вуліцу і пачалі выціскаць людзей у бок праспэкту.
У выніку людзі калёнай пайшлі па праезнай частцы ў бок плошчы Незалежнасьці, заняўшы ўвесь правы бок праспэкту. Яны скандавалі: “Работу!”, “Свабоду!”, “Жыве Беларусь!”
На плошчы Незалежнасьці дэманстранты зноў перакрылі дарожны рух на некалькі хвілінаў.
Дэманстранты дэлегавалі ўдзельнікаў акцыі на перамовы ў Дом ураду. Там ля помніка Леніну стаў ланцуг спэцназаўцаў, але прадпрымальнікі з плошчы не сышлі.
У пастарунках тым часам застаюцца прэвэнтыўна затрыманыя актывісты прадпрымальніцкага руху Алег Шабетнік у Рэчыцы і Алесь Макаеў у Менску, а таксама Аляксандар Цацура і Ўладзімер Шыла з Салігорску.