Грамадзтва

Сьпіс дэпартаваных з Расеі пустэльнікаў

18.04.2008 14:08

Вячаслаў Кулік

Сёньня начальнік Упраўленьня Фэдэральнай міграцыйнай службы (УФМС) Расейскай Фэдэрацыі па Пензенскай вобласьці палкоўнік Міхаіл Салмін паведаміў “Свабодзе” дакладны сьпіс дэпартаваных пустэльнікаў зь Беларусі.

1.Натальля Клімовіч, 1964 года нараджэньня, жыхарка Жабінкі .
2.Алена Панасюк, 1957 года нараджэньня, жыхарка Берасьця .
3. Сьвятлана Жуковіч, 1957 года нараджэньня, жыхарка Столінскага раёну.
4. Ольга Карповіч, 1936 года нараджэньня, жыхарка Бабруйска.
5. Еўдакія Папова, 1937 года нараджэньня, жыхарка Магілёўскай вобласьці.

Са словаў палкоўніка Салміна, сёньня ў прысутнасьці прадстаўніка амбасады Беларусі ў Расеі гэтыя жанчыны яшчэ раз заявілі, што не жадаюць пакідаць рэгіён:

"Усё ж мы выконваем рашэньне аб дэпартацыі, – падкрэсьліў палкоўнік Салмін, – ніякіх штрафаў, ці іншага віду пакараньня, як пра гэта пасьпяшылі заявіць некаторыя СМІ, выкарыстоўваць не будзем. Ёсьць адпаведныя дамоўленасьці з амбасадай Беларусі ў Расеі, а таксама з Міністэрствам унутраных спраў Беларусі”.

Доктар тэалёгіі Уладзімер Марціновіч лічыць, што кожнай зь беларускіх сэктантак цяпер патрабуецца дапамога спэцыялістаў, перадусім псыхолягаў. Між тым навуковец даводзіць, што такой кваліфікаванай службы ў Беларусі пакуль няма.

На пачатку лістапада 2007 году 35 чалавек (у тым ліку — чацьвёра дзяцей) схаваліся ў загадзя абсталяваным склепе ў Бекаўскім раёне Пензенскай вобласьці. Пустэльнікі вырашылі заставацца там да траўня 2008 году, калі, на іх думку, павінен надысьці канец сьвету. Да самаізаляцыі яны падрыхтаваліся старанна, назапасілі рэчы для побыту і прадукты харчаваньня.

Згодна з афіцыйнай інфармацыяй амбасады Беларусі ў Расеі, у падземным сховішчы ля расейскай вёскі Нікольскае знаходзіліся 10 грамадзянаў Беларусі, сярод іх двое дзяцей. Дарослыя лічаць сябе прыхільнікамі сэкты “Горні Ерусалім”, якую ачольваў жыхар вёскі Нікольскае Пётар Кузьняцоў. Гэты прапаведнік у 2006—2007 гадах некалькі разоў наведваў рэгіёны Беларусі, адкуль пазьней выехалі і схаваліся ў пячоры ягоныя прыхільнікі-пустэльнікі.