«Украіна мае такое права. Расея бʼе па тэрыторыі Ўкраіны, і можна зразумець, што Ўкраіна адчувае неабходнасьць забясьпечыць сваю абарону», — сказаў ён карэспандэнту Reuters падчас свайго візыту ў Кіеў.
Кэмэран таксама паабяцаў, што Вялікая Брытанія працягне падтрымліваць Украіну. Паводле ягоных слоў, Лёндан будзе даваць тры мільярды фунтаў кожны год «столькі часу, колькі будзе неабходна». Ён таксама ўдакладніў, што з пункту гледжаньня перадачы ўзбраеньняў Вялікая Брытанія аддала ўсё, што можна.
23 красавіка Лёндан абвясьціў, што выдзяляе Ўкраіне найбуйнейшы ў гісторыі краіны пакет дапамогі на 617 мільёнаў даляраў (500 мільёнаў фунтаў). Паведамлялася, што ён пойдзе на хуткую дастаўку тэрмінова неабходных Украіне боепрыпасаў, сродкаў СПА, дронаў і інжынэрных сродкаў.
У пакет вайсковай дапамогі ўвойдуць, паводле прэс-рэлізу, больш за 1600 ударных і зэнітных ракет, у тым ліку новая партыя крылатых ракет Storm Shadow, чыя далёкасьць палёту складае каля 250 кілямэтраў.
Раней улады Расеі неаднаразова заяўлялі, што перадача УСУ такога роду ўзбраеньняў — «чырвоная лінія», за пераход якой будзе дадзены адказ.
- Дэйвід Кэмэран быў лідэрам Кансэрватыўнай партыі Вялікай Брытаніі з 2005 па 2016 год. З 2010 па 2016 год ён займаў пасаду прэмʼер-міністра краіны. У 2014 годзе Кэмэран рэзка крытыкаваў Расею. Ён таксама выступаў за правядзеньне рэфэрэндуму за выхад Вялікай Брытаніі з ЭЗ. Пасьля галасаваньня Кэмэрана абвінавацілі ў падзеле краіны і Кансэрватыўнай партыі. У лістападзе 2023 году прэмʼер-міністар Рышы Сунак прызначыў яго кіраўніком МЗС.
Форум